職場上唯命是從的Yes Man

「老闆話要咁呀嘛，唔通唔做咩？」，掃把阿袓講完又發晦氣，然後繼續對住老闆做應聲蟲。

明知道老闆決定棄用e-leave，改番用人手填form，大量處理係上黎真係極浪費時間，慳返少少錢但換黎好重既行政成本，我地做細既怨聲載道，唯獨掃把們有邊個敢貿貿然逆旨而行？

當老闆話要下個月就執行新政策時，一班Yes Man族群只係識話:「好啦，等我地搞啦！」，一返回座位就打回原形，即刻滿天牢騷，已經唔知第幾次，一路怨一路死死氣做戇居既事，好可悲……

佢地成日幻想，有朝一日「正義超人」會出現，徹頭徹尾一改頹風，咁Yes Man就會轉移對「正義超人」俯首稱臣。「正義超人」識得體恤民情，為大家發聲。

Yes Man無論任何時候都唔需要再思考，只要唯命是從幫到佢地既人就足夠。

究竟Yes Man係唔識得質疑，定係因為根本對公司無歸屬感，大腦自然盲目，跟大隊齊齊嗌「係！係！係！」，感覺係最安全做法？

有一類Yes Man族群，純粹係太真心，唔好意思向其他人果斷拒絕，以為好人唔怕做。就算自己工作多多都將人地既事攬上身。天真地相信有一日需要幫手時，同事一樣會無條件伸出援手。

如果三生有幸遇到唔計較既好同事，請你必定要好好珍惜。否則你既好心腸只會得到失望既結果。卸膊同事唔會感激你，一邊得寸進尺利用你既善心，一邊係背後笑你傻，一個人做兩份工作。

點解往往Yes Man得唔到好下場？就係對任何既order應該照單全收，以為自己無得揀，為公司解決問題是份內事，否則連小薯仔既位置都分分鐘不保。

作為打工仔，我好明白係階級主義既管治架構底下，做「正義超人」可能會壯烈犧牲，呢個唔服從既後果唔係人人承受得起。當壓力由上至下移，大家只敢say yes！

不過轉個睇法，唔需要一定硬碰硬，婉轉啲話俾老闆聽你既見解，強調最終決定權係佢手上，佢就會耳仔軟番落黎願意聽你講。

唔好妄想「正義超人」會出現，機會只有百分之零點一。始終我地先係最前線做野，高高在上既老闆都希望從我地身上得到最真實既料，係開會時用黎做強勁既武器。Yes Man對老闆黎講係惡瘤，揮之不去，又得唔到實際既功效。

請解放自己同老闆，脫離Yes Man族群吧！

文章刊於作者HR熊 - 職場航行日誌 Facebook及個人網頁，TOPick 獲授權轉載，標題經編輯修改，原題為「Yes Man族群湧現」。